बिर्तामोड । एक्स थ्री बक्सिङ्ग क्लबले अर्जुनधारा–६ मा रहेको अपाङ्ग बाल शिक्षा सरोकार केन्द्रलाई सहयोग गरेको छ । शनिबार बिर्तामोड नयाँबसपार्कस्थित थाम्सुहाङ मार्केटमा रहेको क्लबले सरोकार केन्द्रलाई खाद्यान्न सहयोग गरेको हो ।

संस्थाको सामाजिक उत्तरदायित्व अन्तरगत अपाङ्ग बाल शिक्षा सरोकार केन्द्रलाई सहयोग गरेको बक्सिङका निर्णायकसमेत रहेकी क्बलका प्रबन्ध निर्देशक जोया सुब्बाले बताइन् । साहाराबिहीन बालबालिकालाई सहयोग गर्न पाउँदा खुशी लागेको उनको भनाई छ । क्लबले केन्द्रमा पुगेर ३ बोरा चामल, दाल, तेल, चिनी, सेनेटरी प्याड, बिस्कुट, साबुन, दन्तमञ्जन जस्ता दैनिक आवश्यकीय सामाग्री सहयोग गरेको थियो ।

सहयोग हस्तान्तरण संक्षिप्त कार्यक्रममा क्लबका प्रशिक्षकद्वय राजु कुरुम्बाङ र डम्बर लिम्बु सहभागी थिए । क्लबले अन्तर्राष्ट्रिय खेलाडी उत्पादन गर्ने लक्ष्यका साथ काम गरिरहेको प्रबन्ध निर्देशक सुब्बाले बताइन् । क्लबले महिला खेलाडीलाई प्रोत्साहन गर्ने उद्धेश्यले निशुल्क भर्नाको व्यवस्थासमेत गरेको बताइएको छ ।

बाल सरोकार केन्द्रमा महिला र पुरुष गरेर १४ जना बालबालिका आश्रित रहेको केन्द्रका अध्यक्ष कृष्ण दुलालले बताए । केहि बालबालिका शारीरिक रुपमा असक्त रहेका छन् ।