झापा । राष्ट्रिय परिचयपत्र तथा पञ्जीकरण विभागका कर्मचारीलाई केन्द्रीय अनुसन्धान ब्युरो (सिआइबी)ले पक्राउ गरेको छ । विवरण दर्ता अपरेटरको रूपमा कार्यरत महालक्ष्मी नगरपालिका–३ इमाडोल बस्ने २८ वर्षीय सुनितप्रभाग रेग्मी र ललितपुर–१३ बस्ने २८ वर्षीय आशिषबाबु कुमाललाई पक्राउ गरेको हो ।

सिंहदरबारस्थित विभागमा कार्यरत विवरण दर्ता अपरेटरको युजर आइडी र पासवर्डको दुरूपयोग गरी विभिन्न व्यक्तिहरूको विवरण हेरफेर गरी परिचय पत्र बनाएको आरोपमा उनीहरुलाई पक्राउ गरेको हो । उनीहरूलाई सिआइबीले शनिबार पक्राउ गरेको हो ।

उनीहरूमाथि राष्ट्रिय परिचयपत्र तथा पञ्जीकरण ऐन २०७६ को परिच्छेद ६ को दफा ४१ अनुसार अनुसन्धान अघि बढाएको छ ।

अनुसन्धानका लागि जिल्ला अदालतबाट पाँच दिन हिरासतमा राख्न प्रहरीले अनुमति लिएको छ ।