बिर्तामोड । आज सम्पन्न स्ववियु निर्वाचनमा झापाको गरामनी बहुमुखी क्याम्पसमा राप्रपा निकट विद्यार्थी संगठन राष्ट्रिय प्रजातान्त्रिक विद्यार्थी संगठन (राप्रविसं)को प्यानल विजयी भएको छ ।

देशकै सबैभन्दा थोरै मतदाता रहेको उक्त क्याम्पसको अध्यक्षमा राप्रविसंका केशव खरेल विजय भएका छन् । 

जम्मा खसेको ३७ मतमध्ये खरेलले २३ मत प्राप्त गरेका छन् । अध्यक्षमा नेविसंका रोनिस पाठकले ८ र अनेरास्ववियुकी विमला गिरीले ६ मत प्राप्त गरेका थिए ।

खरेलसँगै सचिव पदमा राप्रविसंका सन्दीप अधिकारी २१ मतसहित विजयी भएका छन् । उनका निकटम प्रतिद्वन्दी नेविंघकी सञ्जिला कार्कीले १० र अनेरास्ववियुकी सुनिता संग्रौलाले ६ मत प्राप्त गरेको निर्वाचन समिति सदस्य खेम बस्नेतले जानकारी दिए । कोषाध्यक्ष पदमा १९ मत प्राप्त गरी रामकृष्ण पौडेल विजयी भएका छन् भने नेविसंघकी खुश्बु खातुनले ९ र अनेरास्ववियुकी अञ्जली मुर्मुले ८ मत प्राप्त गरिने । सदस्य पदमा १७ मत प्राप्त गरी राप्रविसंघका सुदीप ढकाल, अनेरास्ववियुकी रमिला बुढाथोकीले १७ मत प्राप्त गरि विजयी बनेका छन् भने नेविसंका तर्फबाट सरिस्मा मगर र मनिका मगरले समान १३ अंक प्राप्त गरेका छन् ।  संगठनको तर्फबाट समान अंक ल्याउने मध्ये एक जना उम्मेदवारको नाम विजेताको रुपमा दिन बाँकी रहेको बस्नेतले जानकारी दिए ।

बस्नेतका अनुसार अनेरास्ववियुको २० र नेविसंघको ७ मत प्राप्त भएको छ । उनीहरुले २/२ जना उम्मेदवार उठाएका थिए र सबै विजयी भएका छन् । समानुपातिक तर्फ राप्रविसंले उम्मेदवारी नदिएपनि १० मत प्राप्त गरेको छ ।

४० जना मतदाता रहेको गरामनी बहुमुखी क्याम्पसमा ३७ मत खसेको निर्वाचन समितिले जनाएको छ । अनुपस्थित मतदाता मध्ये एकजना जापान, एकजना कोरिया र एकजना मतदाता काठमाण्डौमा रहेको बुझिएको छ ।