बिर्तामोड । वैदेशिक रोजगारीका लागि अजरबैजान पठाउने भन्दै १६ जना युवा ठगिएका छन् । हल्दीबारी, भद्रपुर, अर्जुनधारा र भारत आसामका युवायुवती अजरबैजान जाने नाममा ठगिएका हुन ।

उनीहरूबाट ४२ लाख बढी रकम लिए पछि स्थानीय एजेन्ट भद्रपुर–९ झापा निवासी अनिरुद्र (अनुप) तिम्सिना फरार भएको पीडितहरुको भनाई छ ।

फरार भनिएका अनिरुद्र (अनुप) तिम्सिना

वैदेशिक रोजगारका लागि अजरबैजानमा फ्याक्ट्री वर्करको काम दिने भनेर एजेन्टले  भद्रपुर–९ का दयाराम मगरबाट ८ लाख, दिनेश श्रेष्ठबाट २ लाख, सन्तोष श्रेष्ठबाट ३ लाख ५४ हजार, हल्दिबारी–४ का विष्णुकुमार श्रेष्ठबाट २ लाख ७३ हजार, विक्रम शाही हेमरमबाट २ लाख ६६ हजार, देवेन्द्र आचार्यबाट ५ लाख १० हजार, अर्जुनधारा–३ की लक्ष्मीदेवी खातीबाट १ लाख ७० हजार, अस्मिता गदाइलीबाट १ लाख ७० हजार, पुष्पा मगरबाट १ लाख ७० हजार, सुकराज चाम्लिङ राईबाट १ लाख ७० हजार, मेचीनगरका संगीत श्रेष्ठबाट २ लाख ५० हजार, भारत आसामका अर्जुन क्षेत्रीबाट २ लाख २४ हजार, सुरज श्रेष्ठबाट ३ लाख ४ हजार, जीवन क्षेत्रीबाट २ लाख २४ हजार र मेचीनगर–१ का हेमन्त शर्माबाट २ लाख रुपैँया एजेन्टले पटक पटक गरि लिएको शुक्रबार बिर्तामोडमा पत्रकार सम्मेलन गरेर पिडीतहरुले जानकारी गराएका छन् ।

आसामका युवाहरुले भारतीय नागरिकको क्युआर र नेपाली युवाहरुले काठमाण्डौका सुमनकुमार अग्रवाल र अनिरुद्र तिम्सिनाको नाममा रकम जम्मा गरेको बताए ।

शुरुमा तिम्सिनाले केहि युवाहरुलाई युरोपियन मुलुक लिथुआनिआ लैजाने भनेर भारतको चण्डीगढ लगेर मेडिकल गराउनुका साथै भिषा प्रक्रिया अगाडी बढाएका थिए । पछि लिथुआनिआको भिषा लागेन अजरबैजानका लागि गरौँ भनेर तिम्सिनाले भनेको पिडित दयाराम मगरले बताए । उनीहरुलाई नक्कली भिषा र टिकट देखाएर चण्डीगढ बोलाएर पटक पटक पैसा मागेको र २७ दिनसम्म राखेपछि उडाउन नसकेर नेपाल फर्काएको उनीहरुले बताए । त्यहाँ बस्दा एक छाक मात्र खाएर बस्नु परेको पिडित सुरज श्रेष्ठले पीडा पोखे ।

एजेन्टले उपलब्ध गराएको टिकट

चण्डीगढस्थित कन्सल्टेन्सीको कार्यालयमा जाँदा त्यहाँका मानिसहरुले ‘तिमीहरुको एजेन्ट अनुप हो उसँगमात्र कुरा गर्छु, तिमीहरुलाई चिन्दिन’ भन्दै अरुसँग उनीहरुले कुरै नगर्ने पिडितहरुले बताए ।

काम नभए डबल पैसा फिर्ता गर्छौँ भनेर तिम्सिनाले आफ्नो घरमा छरछिमेकीको अगाडी विश्वास दिलाएको तर पछिल्लो समय उनी सम्पर्कमा नै नरहेको गुनासो गरिन् ।

रकम जम्मा गरेको भौचर

पटक पटक पैसा माग्ने र उडानको समय सारिरहेपछि आफुहरु ठगिएको थाहा पाएको उनीहरुले बताए ।

ऋण काढेर दिएको पैसा तत्काल फिर्ता नगरे कानुनी कारबाहीमा जाने पिडितहरुले बताएका छन् ।