बिर्तामोड । राधिका फाउन्डेसन मार्फत झापामा अध्ययनरत विद्यार्थीहरूलाई काठमाण्डौका देव लामाले पाठ्यसामग्री, न्यानो कपडा र खाद्यान्न सहयोग गरेका छन् ।

हाल अस्ट्रेलियामा रहेका लामाले फाउन्डेसनका विद्यार्थीलाई ४० हजार मूल्य बराबरका स्टेशनरी, न्यानो कपडा र खाद्य सामग्री प्रदान गरेका हुन् ।

बिर्तामोड निवासी टिका पौडेलमार्फत उक्त सामग्री फाउन्डेसनका संस्थापक राधिका दासीलाई प्रदान गरिएको थियो ।

फाउन्डेसनले कमजोर आर्थिक अवस्थाका विद्यार्थीहरूलाई झापा र काठमाण्डौका विद्यालयमा अध्ययन गराउँदै आएको छ ।

आवासीय सुविधासहित अध्ययनरत विद्यार्थीलाई इच्छुक दाताहरूकै सहयोगमा विद्यालय भर्ना गरिएको फाउन्डेसनले जनाएको छ ।

‘पहिले संस्कार अनि संस्कारसहितको परोपकार’ भन्ने नारालाई आत्मसात गरेको फाउन्डेसनले बृहत गुरुयोजना अघि सारेर काम अघि बढाइरहेको छ ।

फाउन्डेसनको सचिवालय र विद्यार्थीको आवासका लागि व्यवस्थित भवन निर्माणाधीन छ ।

निकट भविष्यमा एकै परिसरभित्र विद्यालय, अस्पताल र पार्क निर्माण गर्ने योजना अघि सारिएको संस्थापक दासीले बताएकी छन् ।

फाउन्डेसनमा कर्णालीसहित विकट पहाडी जिल्लाका ४० भन्दा बढी विद्यार्थी अध्ययनरत छन् । उनीहरू काठमाण्डौ र झापामा बस्दै आएका छन् । उनीहरूकै लागि ‘एकदाता, एक छाक भोजन’ अभियान सञ्चालन गरिएको जनाउँदै फाउन्डेसनले त्यस कार्यमा सरिक हुन इच्छुक दाताहरुलाई अपिल समेत गरेको छ ।

फाउन्डेसनमा रहेका विद्यार्थीहरू अधिकांश अभिभावक विहीन हुन् । राधिका फाउन्डेसनले कम्तीमा १०० विपन्न र अभिभावक विहीन बालबालिकालाई आवासीय सुविधासहितको विद्यालय शिक्षा प्रदान गर्ने तयारी गरेको पनि संस्थापक दासीले जानकारी दिइन् ।