बिर्तामोड । झापाको बिर्तामोडमा चाडपर्व नजिकिँदै जाँदा जुत्ता चप्पल मेला शुरु भएको छ । बिर्तामोडको सिटी सेन्टरमा मंगलबारबाट मेला शुरु भएको हो ।

एक कार्यक्रमका बिच बिहीबार बिर्तामोडकी नगर प्रमुख पवित्रा महतारा प्रसाईले मेलाको उद्घाटन गरिन् । उनले मेलाको उद्घाटन गर्दै महङ्गो मुल्य हालेर किनेको विदेशी उत्पादनमात्र राम्रो भन्ने बुझाईलाई परिवर्तन गर्न र स्वदेशी उत्पादनको प्रयोगलाई आम उपभोक्ताले प्राथमिकतामा राख्न आग्रह गरिन् । स्वदेशी उत्पादनको प्रयोगले उपभोक्ता र व्यवसायी दुवैलाई फाइदा पुग्ने उनले बताइन् ।

नेपालमा स्थापित चर्चित जुत्ता चप्पल कम्पनी र ब्राण्डहरु बीएफ डियर हिल, फस्ट वाक सुज, रन सुज, स्मार्ट सुज, क्रस रोड सुज गरी ५ वटा कम्पनीका १० भन्दा बढी ब्राण्डका जुत्ता चप्पल उपलब्ध रहेको जुत्ता उत्पादक नानीराज घिमिरेले जानकारी दिए ।

मेलामा दशैं तिहार लक्षित नयाँ डिजाइनका स्पोर्टस् सुज, क्याजुअल सुज, पाटी सुज, स्कुल सुज, फुटबल, फुटसलका सुज र बालबालिकाका सुजहरु उपलब्ध हुने पनि घिमिरेले बताए ।

मेला अवधिभर न्यूनतम् १५ देखि ५० प्रतिशतसम्म छुटको व्यवस्था रहने आयोजकले जनाएको छ । मेला असोज २४ गतेसम्म चल्ने छ ।