बिर्तामोड । झापाको कमल गाउँपालिकाले वडा नम्बर ५ स्थित मंगलमय माविका विद्यार्थीलाई प्रधानाध्यापकले यातना दिएको घटनाको छानबिन गर्न समिति बनाएको छ । पालिकाले एक विज्ञप्तिमार्फत समिति निर्माण गरी प्रतिवेदन पेश गर्न समय तोकिएको जनाएको हो ।

पालिकाले वडाध्यक्ष लालबहादुर विष्टको संयोजकत्वमा पाँच सदस्यीय छानबिन समिति गठन गरेको जनाएको छ । छानबिन समितिले आगामी २४ गते प्रतिवेदन पेश गर्ने समय दिइएको र दोषी पाइए शिक्षा ऐन, नियमावली र प्रचलित कानुन बमोजिम कारबाही प्रक्रिया अगाडी बढाउने पालिकाले जारी गरेको विज्ञप्तिमा उल्लेख छ । गाउँपालिकाले हाल एसईई लगायत विद्यालयको बार्षिक परीक्षा सञ्चालन भइरहेकाले सहजरुपमा विद्यालय सञ्चालन हुने वातावरण कायम गरिदिन सम्पूर्ण सरोकारवालाहरुलाई आग्रह गरेको छ ।

फेसबुक स्टाटसमा कमेन्ट गरेको निहुँमा विद्यालयका प्रधानाध्यापक मोहन बगालेले कक्षा ११ मा अध्ययनरत विद्यार्थी निर्जला बाँस्कोटालाई निर्मम यातना दिएका थिए ।