बिर्तामोड । झापाको मेचीनगरस्थित संस्थागत विद्यालयहरुको कक्षा १२ को परीक्षामा उत्कृष्ट अंक ल्याउने छात्र प्रवेश दाहाल र छात्रा टीना कार्की सम्मानित भएका छन् । उनीहरुलाई नगरपालिकाले बुधबार एक कार्यक्रम आयोजना गरी सम्मान तथा पुरस्कार वितरण गरेको हो ।

इष्ट होराइजन स्कुलका छात्र दाहालले कक्षा १२ को अन्तिम परीक्षामा ३.४८ र छात्रा कार्कीले ३.४० जीपीए ल्याएका थिए ।

त्यस्तै सामुदायीक तर्फ धुलाबारी माविका अनुस खरेल र पवित्रा न्यौपाने उत्कृष्ट बनेका छन् । खरेलले ३.६५ र न्यौपानेले ३.७४ जीपीए ल्याएका थिए ।

नगरपालिकाले नगरभित्रका सामुदायिक तथा निजी शैक्षिक संस्थाका उत्कृष्ट विद्यार्थीसहित शिक्षक, कर्मचारी, व्यवस्थापन समिति, विभिन्न संस्थागरी ९७ जनालाई सम्मान तथा पुरस्कृत गरेको छ । उत्कृष्ट विद्यार्थीहरुलाई नगदसहित सम्मान पत्र प्रदान गरिएको थियो ।

नगरपालिकाको शिक्षा यूवा तथा खेलकुद शाखाले आयोजना गरेको सम्मान तथा पुरस्कार वितरण समारोह २०८० कार्यक्रममा नगरभित्रका सामुदायिक तथा नीजि विद्यालयमा कक्षा ८ को परीक्षामा सर्वौत्कृष्ट अंक ल्याउने विद्यार्थी मध्ये ४२, अवकाश प्राप्त शिक्षक १९, अवकाश प्राप्त कर्मचारी, उत्कृष्ट शिक्षक, विद्यालय व्यवस्थापन समिति, बाल कलब, कोशी प्रदेशमा सम्पन्न प्रतियोगितात्मक नृत्यमा सर्वोत्कृट हुने र स्काउटबाट एक/एकजना, बाल शिक्षक ३, प्रधानाध्यापक ५, प्याव्सन र एन प्याव्सन, कक्षा १० र कक्षा १२ बाट चार र चार गरी कुल ९७ जनालाई पुरस्कृत तथा सम्मान गरेको हो । नगर शिक्षा शाखाका अनुसार नगरभित्र १७ मावि, ११ निमाबि, १४ प्राथमिक, ४ वटा धार्मिक तथा ६० संस्थागत गरी कुल एक सय ६ वटा शैक्षिक संस्था रहेका छन् ।