बिर्तामोड । मस्तिष्क घातका कारण कठिन अवस्थामा उपचार गराइरहेका मेचीनगर–१० खयरडाँगीका ३० वर्षीय संजोग थापा मगरको उपचारमा आर्थिक अभाव भएको छ ।

गाउँघरमा मजदुरी गरेर परिवारको जीविका चलाउँदै आएका विपन्न परिवारका उनलाई पन्ध्र दिन अघि कार्तिक १ गते उच्च रक्तचापका कारण घरमै मस्तिष्क घात भएको थियो । त्यसपछि उपचारका लागि विर्तामोडको बीएण्डसी अस्पतालमा भर्ना गरिएको थियो ।

अस्पतालका वरिष्ठ सुपरभाइजर दिपेश भट्टराईले संजोगको हालसम्मको उपचारको बक्यौता पाँच लाखभन्दा धेरै भइसकेको बताए । हाल संजोगको आइसीयु कक्षमा उपचार भइरहेको छ । 

उनको टाउकाको शल्यक्रिया भइसकेको र खर्च जुटाउने काम भइरहेको बताइएको छ । अस्पतालले थापाको बाँकिमा उपचार गराइरहेको अस्पतालका सुपरभाइजर दिपेश भट्टराइले जानकारी दिए ।

मलेसियामा रोजगार गरेर गत वर्ष फर्किदा संजोग विरामी नै थिए । उनको कलेजोमा समस्या देखिएको थियो भने उच्च रक्तचापको समस्या पनि थियो । घर चलाउनै आर्थिक संकट परेपछि संजोगकी पत्नी लक्ष्मी थापा मगर दुई महिना अघि वैदेशिक रोजगारीको सिलसिलामा दुबई गएकी छन् । उनीहरुको ९ बर्षकी छोरी र ७ वर्षका छोरा छन् ।

संजोगका बुवा राजेन्द्र थापा मगरको दाहिने हात र खुट्टा प्यारालाइसिसका कारण चल्दैन । उनी शारीरिक रुपमा अशक्त बनेका छन् । आमा पनि विरामी नै छन् ।

‘घरको आर्थिक अवस्था ज्यादै दयनीय छ,’ संजोगका भिनाजु थमबहादुर तामाङ भन्छन्–‘अहिलेसम्म ऋणपान र आफन्त गुहारेर केही रकम अस्पतालमा डिपोजिट गरेका छौं । अस्पताल व्यवस्थापनले अरु पैसा जम्मा नगरी उपचार अघि बढाउन गाह्रो हुन्छ, छिटो पैसा खोजेर ल्याउनु पर्यो भनिरहेका छन् । हामीसँग पैसा निकाल्ने अब कुनै उपाय बाँकी छैन ।’

संजोगका बुवा राजेन्द्र थापा र आमा दिलमाया थापाले अस्पताल परिसरमै आज दिउँसो पत्रकारहरुसँगको भेटमा उपचारका लागि आर्थिक सहयोग गरेर आफ्नो छोरालाई बचाइदिन सार्वजनिक आह्वान गरेका छन् । आमा दिलमाया थापा मगरले भनेकी छन्–‘बुढेशकालको सहारा बन्ला भनेको छोरा बिरामी पर्यो । दया गरेर सहयोग गरिदिए उसको प्राण बच्ने थियो ।’

बीएण्डसी अस्पतालको न्यूरोलोजी विभागले संजोगको ब्रेन हेमरेज र लिभर रोगको उपचार भइरहेको जनाएको छ ।

मेचीनगर–१० का डेभिड शिवाकोटीले संजोगलाई बचाउन गाउँमा चन्दा संकलन अभियान सुरु गरिएको जानकारी दिए । ज्यालादारी काम गर्दै आएका संजोगको परिवारको अन्य आयस्रोत नभएकाले सबैसँग आर्थिक सहयोगका लागि अपिल समेत गरिएको शिवाकोटीले बताएका छन् ।

संजोग बचाउ अभियानमार्फत उपचार सहयोग जुटाउन संजोगका भिनाजु थमबहादुर तामाङको नाममा ग्लोबल आइएमई बैंक धुलाबारी शाखामा बचत खाता खोलिएको छ । इच्छुक दाताहरुले सोही बैंक खातामा सहयोग रकम जम्मा गर्न सकिने स्थानीय सांगे शेर्पाले बताए ।

बैंक खाताको विवरण :

बैंक : ग्लोबल आइएमई बैंक, धुलाबारी शाखा

खातावालाको नाम : थमबहादुर तामाङ

खाता नं= ०२३०७०१०१२४९५९