बिर्तामोड । बिर्तामोड अन्तराष्ट्रिय औद्योगिक ब्यापार महोत्सवको सम्पूर्ण तयारी पूरा भएको छ । आगामी फागुन १५ गतेसम्म सञ्चालन हुने महोत्सवको उद्घाटन आज  प्रतिनिधीसभाका सभामुख देवराज घिमिरेले गर्ने महोत्सव मूल आयोजक समितिले जनाएको छ ।

बिर्तामोड उद्योग वाणिज्य संघका वरिष्ठ उपाध्यक्ष तथा महोत्सव मूल आयोजक समिति संयोजक राजु न्यौपानेले महोत्सवको सम्पूर्ण तयारी पूरा भएको बताए । महोत्सव बिर्तामोड नगरपालिका–२ रामचोकस्थित पूर्वपश्चिम राजर्मागको उत्तरमा सञ्चालन हुँदैछ ।

सभामुख घिमिरेसँगै उपसभामुख इन्दिरा राना मगर, झापा क्षेत्र नम्वर २ का सांसद्, जिल्ला स्थित राजनीतिक दलका प्रमुख तथा प्रतिनिधि विभिन्न संघ संस्थाका प्रमुख तथा प्रतिनिधि,  स्थानीय तहका जनप्रतिनिधि, व्यवसायी तथा स्थानीयको उपस्थितिमा महोत्सव उद्घाटन  हुने बताइएको छ ।

प्रदेश १ कृषि , पर्यटन एवम् औद्योगिक दृष्टिकोणले समेत  सुगम स्थल रहेको र यहाँको उत्पादनलाई भारत लगायतका विभिन्न मुलुकमा निर्यातका लागि पहिचान गराउने  उद्देश्यले महोत्सवमा प्रर्दशनी गरिने बताइएको छ ।

महोत्सवमा २०० सय वटा स्टल रहने छन् । महोत्सवमा अन्तराष्ट्रिय औद्योगिक उपकरण, कृषि तथा जडिबुटी, पर्यटन, दैनिक उपभोग्य वस्तुहरु, हस्तकला तथा तयारी पोशाक, प्रर्दशनमा रहने बताइएको छ । महोत्सवमा बंगलादेश, पाकिस्तान र भारतका व्यवसायीहरुको समेत सहभागीता रहने बिर्तामोड उद्योग बाणिज्य संघका अध्यक्ष  प्रकाश शिवाकोटीले बताए । महोत्सवलाई सभ्य र भब्य बनाउन सबै तयारी पूरा भई सकेको अध्यक्ष शिवाकोटीले बताए ।

महोत्सवले कृषि र पर्यटनका साथै औद्योगिक क्षेत्रमा आर्थिक गतिविधिलाई चलायमान बनाउन सहयोग पुग्ने र झण्डै ४५ करोड रुपैयाँ बरावरको आर्थिक कारोवहर हुने अपेक्षा गरिएको महोत्सव मूल आयोजक समितिका संयोजक  न्यौपानेले बताए । उनले राष्ट्रिय अर्थतन्त्रको मेरुदण्डको रुपमा रहेको निजी क्षेत्रले आर्थिक क्षेत्रलाई चलायमान बनाउन अहम भूमिका निर्वाह गर्ने बताए ।

महोत्सवलाई मुलत चार भागमा विभाजन गरिएको र रहेक दिन मनोरञ्जनका लागि साङ्गितिक र संस्कृतिक कार्यक्रम समेत गरिने संयोजक न्यौपानेको भनाईछ । पूर्वमा सञ्चालित ठूला तथा मझौला उद्योगले समेत यो क्षेत्रको आर्थिक गतिविधिलाई चलायमान बनाउन मद्दत पुग्ने विश्वास गरिएको छ ।