बिर्तामोड । झापाको बिर्तामोडस्थित मनमोहन मेमोरियल पूर्वाञ्चल क्षेत्रीय सामुदायिक अस्पतालले निशुल्क डायलाइसिस सेवा शुरु गरेको छ । आइतबारबाट अस्पतालले डायलाइसिस सेवा निशुल्क शुरु गरेको हो ।

रोटरी क्लब अफ बिर्तामोड मिड टाउनसँगको सहकार्यमा डायलाइसिस सेवा शुरु गरेको अस्पतालले सरकारको सिफारिस लिएर आउने बिरामीहरुलाई डायलाइसिस निशुल्क गर्न शुरु गरेको अस्पतालका प्रशासक कोमल राईले जानकारी दिए । उपचारका लागि ९ जना बिरामीको सिफारिस आइसकेको उनले बताए ।

आइतबार माइ नगरपालिका–११, इलामका भिमराज पाण्डे, बिर्तामोड–४, झापाकी रुपा न्यौपाने र रोङ गाउँपालिका–८, इलामकी अमृता राईले निशुल्क सेवा लिएको अस्पतालका कर्मचारी गुरुप्रसाद निरौलाले जानकारी दिए । यस अघि अस्पतालमा १० जना बिरामीले सशुल्क उपचार गराइरहेकोमा ९ जनाले निशुल्क सेवाका लागि सिफारिस ल्याएको र अन्य अस्पतालबाट २ जना रेफर भएर आएका गरि १२ जना बिरामीले डायलाइसिस गराइरहेको उनले बताए ।

अस्पतालमा डायलाइसिसका लागि सात बेड रहेकोमा एक बेड इमर्जेन्सी र एक संक्रमित बिरामीका लागि छुट्याउनु पर्ने र अन्य पाँच बेड निशुल्क सेवा लिने बिरामीका लागि प्रयोग गर्न सकिने प्रशासक राईले जानकारी दिए । बिरामीले डायलाइसिस शुल्क तिर्नु नपरेपनि नियमित खाने औषधी र डायलाइसिसको समयमा कुनै औषधी आवश्यक भए आफैँले खरिद गर्नुपर्ने स्वास्थ्यकर्मी मेनुका मेचेले जानकारी दिइन् । उनका अनुसार दैनिक १५ जना बिरामीको निशुल्क डायलाइसिस गर्न सकिन्छ ।