बिर्तामोड । झापाको बिर्तामोडस्थित मनकामना कलेजले आफ्नो २४औँ बार्षिकोत्सव सम्पन्न गरेको छ । कौटिल्य एजुकेशन फाउण्डेसन प्रा.लि. अन्तर्गत सञ्चालित कलेजले मंगलबार विविध कार्यक्रम गरी बार्षिकोत्सव सम्पन्न गरेको हो ।

कार्यक्रमका प्रमुख अतिथि त्रिभुवन विश्व विद्यालय क्षेत्रीय परीक्षा नियन्त्रण कार्यालय विराटनगरका सह–नियन्त्रक डिल्ली प्रसाईँले कलेजलाई गुणस्तरीयता कायम गर्न क्युएए सर्टिफाइड हुन सुझावसहित कलेजको उत्तरोत्तर प्रगतिको कामना गरे ।

कार्यक्रममा १० बर्षभन्दा बढी सेवा गर्ने २ महिलासहित ११ जना प्राध्यापकलाई सम्मान गरिएको कलेजका कर्मचारी मिलन कोइरालाले जानकारी दिए । कक्षा १२ मा सर्वोत्कृष्ट अंक ल्याउने र स्नातक तहका विभिन्न बर्षमा उत्कृष्ट अंक ल्याउने विद्यार्थीहरुलाई नगद पुरस्कारसहित सम्मान गरिएको उनले बताए ।

कार्यक्रममा स्नातक तहमा नव आगन्तुक विद्यार्थीहरुलाई स्वागत गरिएको थियो । विद्यार्थीहरुले गायन, नृत्य, कविता, नाटक, दोहोरीलगायत प्रस्तुती दिएका थिए ।

प्रा.लि.का अध्यक्ष कुमार बस्नेतको अध्यक्षतामा सम्पन्न कार्यक्रममा विर्तामोड नगरपालिकाका शिक्षा शाखा प्रमुख तिलचन भण्डारी, इलाका प्रहरी कार्यालय अनारमनीका प्रमुख डीएसपी रुगमबहादुर कुँवर विशिष्ट अतिथि थिए ।

प्राध्यापक विजय तिम्सिनाले सञ्चालन गरेको कार्यक्रममा सहभागीहरुलाई क्याम्पस प्रमुख प्रेमप्रसाद भट्टराईले स्वागत गरेका थिए ।