बिर्तामोड । स्वास्थ्य तथा जनसंख्या मन्त्रालयले इलाम अस्पतालसहित देशका विभिन्न स्थानमा रहेका २२ वटा अस्पतालमा १३३ सेट डायलाइसिस मेसिन वितरण गरेको छ । स्वास्थ्य सेवा विभागल आवश्यकताका आधारमा मेसिन वितरण गरिएको जनाएको हो ।

नेपालमा बार्षिक तीन हजारभन्दा बढीको मिर्गौला फेल हुने अनुमान गरिएको छ । तीमध्ये धेरैले डायलाइसिस तथा मिर्गौला प्रत्यारोपण गर्न नपाउँदा उपचारबाट बञ्चित हुनुका साथै मृत्यु समेत हुने गरेको छ । डायलाइसिसका लागि लामो लाइन हुँदा कतिपय बिरामीले हप्तामा तीन पटक गर्नुपर्ने डायलाइसिस दुई पटक मात्र गर्नुपर्ने अवस्था छ ।

मन्त्रालयले बिरामीको समस्यालाई पहिचान गर्दै धेरैभन्दा धेरै बिरामीले सहज रुपमा सेवा लिन सकून भन्दै डायलाइसिस मेसिन थप गरेको जनाएको छ ।

कहाँ कहाँ वितरण भयो डायलाइसिस?

व्यवस्थापन महाशाखाका अनुसार इलाम अस्पताललाई २ सेट, कोशी अस्पताल, विराटननगरलाई ६ सेट, बीपी कोइराला स्वास्थ्य विज्ञान प्रतिष्ठान धरानलाई १० सेट, जनकपुर प्रादेशिक अस्पताललाई ३ सेट, गजेन्द्र नारायण निधि सगरमाथा अस्पताल राजविराजलाई ५ सेट, नारायणी अस्पताल वीरगञ्जलाई ५ सेट उपलब्ध गराइएको छ ।

यस्तै, चिकित्सा विज्ञान राष्ट्रिय प्रतिष्ठान वीर अस्पताललाई १० सेट, शहीद गंगालाल राष्ट्रिय हृदयरोग केन्द्र काठमाडौंलाई ३ सेट, बीपी कोइराला मेमोरियल क्यान्सर अस्पताल चितवनलाई ४ सेट, भरतपुर अस्पताल चितवनलाई ५ सेट,  त्रिवि शिक्षण अस्पताल महाराजगञ्जलाई ४ सेट, नेपाल प्रहरी अस्पताल महाराजगञ्जलाई ४ सेट र शहीद धर्मभक्त राष्ट्रिय प्रत्यारोपण केन्द्र भक्तपुरलाई २० सेट मेसिन वितरण गरिएको छ ।

यसैगरी, पोखरा स्वास्थ्य विज्ञान प्रतिष्ठान पोखरालाई ५ सेट, भेरी अस्पताल नेपालगञ्जलाई ६ सेट, राप्ती स्वास्थ्य विज्ञान प्रतिष्ठान दाङलाई १० सेट, राप्ती प्रादेशिक अस्पताल तुलसीपुर दाङलाई ८ सेट, कर्णाली प्रादेशिक अस्पताल सुर्खेतलाई ४ सेट, कर्णाली स्वास्थ्य विज्ञान प्रतिष्ठान जुम्लालाई ६ सेट, सेती प्रादेशिक अस्पताल कैलाली धनगढीलाई ४ सेट, डडेल्धुरा अस्पताल डडेल्धुरालाई ५ सेट र गर्हौ प्राथमिक अस्पताल वालिङ्ग स्याङ्गजालई ४ सेट गरी १३३ सेट डायलाइसिस मेसिन वितरण गरिएको महाशाखाले जनाएको छ ।