बिर्तामोड । कामना सेवा विकास बैंकले झापा र मोरङमा सर्वसुलभ तथा अत्याधुनिक बैंकिङ्ग सेवा पुर्याउने उद्धेश्यका साथ थप नयाँ स्थानहरूमा मोबाइल एप मार्फत शाखा रहित बैंकिङ्ग सेवा शुभारम्भ गरेको छ ।

बैंकले सेवा विस्तार गर्ने क्रममा असार २६ गते आईतबारबाट झापाको बुद्धशान्ति गाउँपालिका–१ को नमुना चोकमा, मोरङ्गको केराबारी गाउँपालिका–१० को थापाटारमा र सुन्दरहरैंचा–१२ शुक्रबारेमा शाखा रहित बैंकिङ्ग सेवा सञ्चालनमा ल्याएको हो । झापाको बुद्धशान्ति–१ नमुना चोक स्थित बबि सप्लायर्स (नन्दकुमार याफु राई), मोरङ्गको केराबारी–१० थापाटार स्थित केराबारी भ्यु होटल एण्ड बार (धनबहादुर लिम्बु) र सुन्दरहरैंचा–१२ शुक्रबारे स्थित आरजु कस्मेटिक एण्ड रेडिमेड (राजन भगत) लाई शाखा रहित बैंकिङ्ग सञ्चालनको लागि व्यावसायिक प्रतिनिधि नियुक्त गरिएको छ ।

झापाको बुद्ध शान्ति–१ का वडा अध्यक्ष अनिल वाग्लेले नमुना चोकमा, मोरङ्गको केराबारी–१० का वडा अध्यक्ष पुर्णबहादुर मगरले थापाटारमा र सुन्दरहरैंच–१२ का वडा अध्यक्ष रोशन प्रसाद ढकालले शुक्रबारेमा  शाखा रहित बैंकिङ्ग सेवाको उद्घाटन गरी सेवा शुभारम्भ गरेका थिए ।

शाखा रहित बैंकिङ्ग मार्फत खाता खोल्ने, निक्षेप संकलन, रकम भुक्तानी, विभिन्न बिल भुक्तानी लगायतका सुविधाहरु प्रदान गरिनेछ । यो सेवाबाट ग्रामीण तथा बैंकिङ्ग पहुँच नपुगेका क्षेत्रमा बैंकप्रति उल्लेख्य विश्वास एवम् बैंकिङ्ग अवधारणाको विकास हुने अपेक्षा बैंकले लिएको छ ।