बिर्तामोड । चालु आर्थिक बर्षको एघार महिनाको अवधिमा झापामा ५ सय ५६ वटा दुर्घटना भएका छन् । उक्त दुर्घटनामा ८ सय २६ वटा सवारी साधन संलग्न रहेका छन् । सबैभन्दा बढी दुर्घटनामा मोटरसाइकल परेका छन् । यो अवधिमा ५ सय पाँचवटा मोटरसाइकल दुर्घटनामा परेका हुन् ।

ती दुर्घटनामा परि एक सय सात जना मानिसले ज्यान गुमाएको जिल्ला ट्राफिक प्रहरी कार्यालय झापाले जनाएको छ । मृत्यु हुनेमा सबैभन्दा बढी ८८ जना पुरुष, १४ जना महिला र पाँच जना बालबालिका रहेको कार्यालय प्रमुख प्रहरी निरीक्षक अशोक जबेगुले जानकारी दिए । दुर्घटनाबाट ६४३ जना मानिस सामान्य र २२९ जना सख्त घाइते भएको उनले बताए ।

राजश्व रकम ३ करोड बढी

कार्यालयले चालु आवको यो अवधिमा ३ करोड ३ लाख पाँच हजार पाँच सय रुपैँया राजश्व संकलन गरेको छ । कार्यालयले ४२ हजार ७ सय वटा सवारी साधन कारबाहीबाट उक्त रकम संकलन गरेको कार्यालयका सहायक प्रहरी निरीक्षक यामकुमार खड्काले जानकारी दिए ।

सबैभन्दा बढी राजश्व मोटरसाइकल कारबाहीबाट संकलन भएको छ । यो अवधिमा मोटरसाइकल कारबाहीबाट १ करोड १२ लाख ५१ हजार रुपैँया राजश्व संकलन भएको उनले जानकारी दिए ।