बिर्तामोड । डाक्टरलाई अपशब्द प्रयोग गर्दै भौतिक आक्रमण गर्नेसम्मको धम्की पछि झापा हल्दिबारी गाउँपालिकाका स्वास्थ्यकर्मी आन्दोलित बनेका छन ।  हल्दिबारी २ का ५२ बर्षीय काशी आचार्यले उपचारको क्रममा हल्दिबारी गाउँपालिकाका डाक्टर विकाश ढकाललाई अपशब्द प्रयोग गर्दै भौतिक क्षतिसमेत गर्ने चेतावनी दिएको भन्दै स्वास्थ्यकर्मीहरु आन्दोलित भएका हुन ।

स्वास्थ्यकर्मीहरुले विहिबार एक बिज्ञप्ति जारी गरि भौतिक क्षति गर्ने चेतावनी दिएको कार्यको भर्त्सना गर्दै आन्दोलनको चेतावनी दिएका हुन । उनीहरुले चैत्र २ गते बिरामी भएर उपचारका लागि आएका आचार्यले डाक्टर ढकाललाई गालिगलौज गर्दै अपशब्द बोलेको र भौतिक क्षतिसम्म गर्ने चेतावनी दिएको भन्दै आचार्यलाई कानुनी कारबाहीको माग गरेका छन ।

आचार्यलाई कारबाहीको माग गर्दै बिहिबार गाउँपालिका अध्यक्ष रबिन्द्र लिङ्देनलाई ज्ञापन पत्रसमेत बुझाएको गोल्धाप स्वास्थ्य चौकीका प्रमुख सिअहेव अधिकृत यामप्रसाद न्यौपानेले बताए । तीन दिनभित्र पिडकलाई कानुनी कारबाही नगरिए आइतबारदेखि गाउँपालिका भित्रका सबै स्वास्थ्य संस्थाका आकस्मिक सेवाबाहेकका सम्पूर्ण सेवाबन्द गर्ने विज्ञप्तिमा उल्लेख छ ।

डाक्टर ढकालले आचार्यलाई स्वास्थ्य जाँचपछि आवश्यक औषधी लेखिदिएको तर आचार्यले अन्य औषधीसमेत घर लगेर राख्ने भन्दै मागे पछि डाक्टर ढकालले लक्षण नभएको रोगको औषधी दिन नमिल्ने बताएपछि विवाद भएको बताइएको छ ।  

स्वास्थ्यकर्मीद्वारा जारी विज्ञप्ति