बिर्तामोड । झापाको बिर्तामोड नगरपालिकामा आगामी फागुन २८ गतेदेखि हात्ती पाइले रोग विरुद्धको औषधी खुवाइने भएको छ । अभियानको रुपमा सञ्चालन गरिने कार्यक्रममा एक लाख १० हजार ३५५ जनालाई औषधी खुवाउने लक्ष्य राखिएको छ ।

हात्ती पाइले रोग विरुद्धको औषधी सेवनसम्बन्धि नगरपालिका स्तरीय योजना तर्जुमा तथा बहुनिकाय गोष्ठी बिर्तामोडमा सम्पन्न भएको छ । स्वास्थ्य शाखाको आयोजनामा मंगलबार सम्पन्न गोष्ठीमा फागुन २८ गतेदेखि सञ्चालन हुने हात्ती पाइले रोग विरुद्वको औषधी सेवन अभियानका बारेमा छलफल गरिएको थियो । कार्यक्रममा स्वास्थ्य कार्यालय झापाका फोकल पर्सन जिवन चौलागाईले यस अभियानको तयारी, औषधी खाँदा र खुवाउँदा ध्यानदिनु पर्ने कुराका साथै अभियानको व्यवस्थापनका विषयमा प्रशिक्षण दिएको बिर्तामोड नगरपालिकाका प्रेस संयोजक रमेश तिवारीले जानकारी दिए ।

उहाँले बिर्तामोडमा भाडामा बस्नेहरुको संख्या उल्लेख्य रहेको र सबैलाई औषधी खान प्रेरित गरिने बताइएको छ । अभियान सञ्चालनका लागि बिर्तामोडमा ५ सय ५५ जना स्वास्थ्यकर्मी र ३ सय ७५ जना स्वयम्सेवक गरि ९ सय ३० जना खटाइने भएको छ । यसको लागि उनीहरुलाई तालिम दिने काम भईरहेको छ ।

हात्तीपाइले रोग विरुद्वको औषधी २ वर्षभन्दा मुनिका बालबालिका, सिकिस्त बिरामी, गर्भवती, ७ दिनसम्मको सुत्केरी बाहेकले सेवन गर्न मिल्ने स्वास्थ्य कार्यालय झापाले जनाएको छ । फागुन २८ गतेदेखि शुरु हुने यो अभियान औषधी वाइ नसकुञ्जेलसम्म लगातार सञ्चालन हुने छ ।

गएको वर्ष यस अभियानमा बिर्तामोडले ८७ प्रतिशत र स्वास्थ्य कार्यालय झापाले ८५ प्रतिशत प्रगती हासिल गरेको थियो ।