बिर्तामोड । अमेरिकी सहयोग परियोजना मिलेनियम च्यालेञ्ज कम्प्याक्ट (एमसीसी) को विरोध गर्दै आह्वान गरिएको बन्दको झापामा आंशिक प्रभाव परेको छ । आजको प्रतिनिधि सभाको बैठकमा एमसीसी टेबुल गर्ने तयारी गरेपछि त्यसको विरोध गर्दै नेपाल कम्युनिष्ट पार्टी, देशभक्त जनगणतान्त्रिक मोर्चा, (नेपाल), नेकपा (क्रान्तिकारी माओवादी) लगायतले एकदिने बन्द आह्वान गरेका थिए ।

बन्दका कारण लामो दुरीका सवारी कम चलेका छन् भने प्रमुख शहरका पसलहरु खुलेका छन् । धेरै जसो विद्यालयहरु भने बन्द गरिएको छ । विद्यालयले अभिभावकहरुलाई असहज परिस्थितीका कारण भन्दै आज विद्यालय बन्द हुने सूचना पठाएका छन् । सडकमा सुरक्षा निकायको बाक्लो उपस्थिती रहेको छ । बन्दको सूचना पाएसँगै गृह मन्त्रालयले सुरक्षा निकायलाई पत्राचार गरेर कानून विपरीतका गतिविधीहरु हुन नदिन र जिल्लाको समग्र शान्ति सुव्यवस्था कायम राख्न निर्देशन दिएको थियो ।

बन्द गराउँदै हिड्ने चार जनालाई प्रहरीले पक्राउ गरेको छ । झापाको दुर्गापुरबाट वैज्ञानिक समाजवादी पार्टीका तीन जना कार्यकर्तालाई पक्राउ गरिएको जिल्ला प्रहरी झापाका सूचना अधिकारी वसन्त पाठकले जानकारी दिए । पाठकका अनुसार प्रहरीले मेचीनगरको कालीखोला क्षेत्रबाट नेपाल कम्युनिष्ट पार्टीका एक जनालाई पक्राउ गरेको छ ।