काठमाण्डौ । अभिनेत्री रेखा थापा विवाह बन्धनमा बाँधिएकी छन् । आफूले केही दिनअघि बलराम शाही ठकुरीसँग ‘कोर्ट म्यारिज’ गरेको थापाले जानकारी दिइन्।

थापा र शाही लामो समयदेखि प्रेममा थिए । ४० वर्षीय शाही ठकुरी विदेशमा बस्दै आएका छन् । उनीहरूले काठमाडौं जिल्ला अदालतमा पुगेर विवाह गरेका हुन् ।

थापाले यसअघि निर्माता छविराज ओझासँग विवाह गरेकी थिइन् । उनीहरूले १० वर्षअघि डिभोर्स गरेका थिए ।

‘हिरो’ चलचित्रबाट नेपाली सिने जगतमा डेब्यू गरेकी थापाले हिम्मत, किस्मत, कसले चोर्यो मेरो मनलगायत चलचित्रमा अभिनय गरेकी छन् । अभिनयसँगै थापाले विभिन्न चलचित्र निर्माण गरेकी छन् ।

३७ वर्षीया थापा पछिल्लो समय राजनीतिमा पनि सक्रिय भएकी थिइन् ।  गत मंसिरमा भएको राष्ट्रिय प्रजातन्त्र पार्टीको महाधिवेशनमा थापा महामन्त्रीमा उठेपनि पराजित बनिन् ।