विराटनगर । प्रदेश १ को पछिल्लो सरकारले खारेज गरेको प्रादेशिक सञ्चार प्रतिष्ठान उच्च अदालत विराटनगरले सदर गरेको छ ।

अदालतका मुख्य न्यायाधीश तीलप्रसाद श्रेष्ठ र न्यायाधीश मुरारीबाबु श्रेष्ठको संयुक्त इजलासले प्रतिष्ठान खारेजीविरुद्धको रिटमाथि सुनुवाई गरेको अदालतका सूचना अधिकारी ओम सुवेदीले बताए ।

प्रादेशिक सञ्चार प्रतिष्ठान खारेज गर्ने प्रदेश १ मन्त्रिपरिषद्को सक्कल निर्णय झिकाउन उच्च अदालत विराटनगरले आइतबार आदेश दिएको थियो ।

प्रतिष्ठान खारेज गर्ने मन्त्रिपरिषद्को निर्णयविरूद्ध प्रतिष्ठानका कार्यकारी निर्देशक यज्ञप्रसाद शर्माले उच्च अदालतमा रिट निवेदन दायर गरेका थिए । रिट खारेज सँगै कार्यकारी निर्देशक शर्माको पद पनि खारेज भएको छ ।

तत्कालीन मुख्यमन्त्री शेरधन राई नेतृत्वको मन्त्रिपरिषद्को २०७७ पुस ६ को निर्णयले शर्मालाई चार वर्षका लागि प्रतिष्ठानको कार्यकारी निर्देशकमा नियुक्त गरेको थियो ।

तत्कालीन सरकार निकट मानिसहरुको भर्ती केन्द्रको रुपमा रहेको प्रतिष्ठान खारेजीको माग उठेपछि मुख्यमन्त्री राजेन्द्र राई नेतृत्वको मन्त्रिपरिषद्को मंसिर ९ को बैठकले प्रतिष्ठान खारेज गर्ने निर्णय गरेको थियो ।

यस्तै, मुख्यमन्त्री राई नेतृत्वको मन्त्रिपरिषद्ले प्रदेश पर्यटन बोर्ड खारेज गर्ने निर्णयमा पनि उच्च अदालत विराटनगरले कारण देखाऊ आदेश जारी गरेको छ । अदालतले बोर्ड खारेज गर्ने निर्णय कार्यान्वयन नगरी यथास्थितिमा राख्न आदेश दिइसकेको छ । बोर्डको अन्तिम सुनुवाइ हुन बाँकी छ ।