बिर्तामोड । नेपाली कांग्रेसका महामन्त्री विश्वप्रकाश शर्माले मुलुकमा बलिदान र संघर्षले परिवर्तन सम्भव भएको बताएका छन् । नेपाली लोकतान्त्रिक आन्दोलनका योद्धा आदिवासी नेता स्वर्गीय तुर्सा हेमरमको २४ औँ स्मृति दिवसमा आयोजित कार्यक्रममा महामन्त्री शर्माले त्यस्तो धारणा व्यक्त गरेका हुन ।

तुर्सा हेमरम स्मृति प्रतिष्ठान कन्काई १ झापाले सोमबार आयोजना गरेको कार्यक्रममा महामन्त्री शर्माले मुलुकका लागि जीवन बिताउने र उत्सर्ग गर्ने व्यक्तिको सम्मान पुराण लगाएर घरका सदस्यलाई सम्झेजस्तो मात्रै नभएको बताए ।

झापा विद्रोहको भूमि भएको बताएका उनले तुर्सा हेमरमले परिवर्तन र रुपान्तरणको झन्डा उठाएको उल्लेख गरे । ‘एउटा जीवन एकै झड्कामा गुमाउने व्यक्ति सहिद हुन्छ,’ उनले भने, ‘तुर्सा मुलुकका लागि जीवन बिताउने महान् मानिस हो, उहाँ सहिदभन्दा कम हुनुहुन्न ।’

विचारको झन्डा उठाउने सबैलाई सम्झनु र दृढतापूर्वक उसको विचारलाई जीवन्त राख्नु हरेक परिवर्तन पक्षधरको दायित्व भएको शर्माको तर्क छ । अब राजनीतिक मुद्दामा कसैले ज्यान गुमाउनुपर्ने दिन आउन नहुने बताएका उनले वाद, विचार र झन्डाको कारण कसैलाई मुद्दा लगाएर जीवनभर दुःख दिने कुकर्मका लागि तुर्साहरूले त्याग गरेको स्मरण गरे ।

कांग्रेसलाई आफू रुपान्तरण मात्रै होइन, समाज परिवर्तन गर्ने जिम्मेवारी रहेको उनले बताए । आफूले संयमित र जिम्मेवार भएर काम गर्ने बताएका उनले राजनीति साझा मञ्च भएको तर्क गरे । व्यवस्था होइन, अव्यवस्था अन्त्य गर्न जरुरी भएको उनले जनाए । ‘व्यवस्था मात्रै होइन अवस्था बदल्ने सोचले तुर्साहरू राजनीतिमा लाग्नुभयो’, उनले भने, ‘राजनीति राम्रो र रङ्गीन कार्यालय बनाउनु मात्र होइन ।’