काठमाडौं । नेपाल फार्मेसी परिषदले लिएको १८ औँ नाम दर्ता परीक्षा (लाइसेन्स) को ब्याचलर इन फार्मेसीमा २० प्रतिशत मात्र उत्तीर्ण भएका छन् । डिप्लोमा इन फार्मेसीमा उत्तीर्ण हुनेको संख्या ४६ प्रतिशत छ ।

परीक्षाका लागि डिप्लोमा इन फार्मेसीमा १ हजार १३५ जना र ब्याचलर इन फार्मेसीमा ५७६ जनाले फारम भरेका थिए । परीक्षामा अनुत्तीर्ण हुने अधिकांशजसो नयाँभन्दा पनि पुराना विद्यार्थीहरु रहेको परिषदका रजिष्ट्रार सञ्जीवकुमार पाण्डेयले बताए ।

उनले भने, ‘फ्रेसर विद्यार्थीहरुले ठिकै गरेका छन्। तर पटक पटक परीक्षा दिइरहेका विद्यार्थीहरुको नतिजा भने सन्तोषजनक देखिएको छैन ।’

परीक्षाको नतिजाले विद्यार्थीको पढाई र फार्मेसी शिक्षाको स्तर र गुणस्तर माथि प्रश्न उठेको उनले बताए । चिकित्सा शिक्षा आयोग र प्राविधिक शिक्षा तथा व्यावसायीक तालिम परिषद् (सिटिइभीटी) यो विषयमा गम्भीर हुनुपर्ने उनले बताए । यो नजितापछि आफूहरुले अवस्था के छ भनेर उनीहरुलाई प्रतिवेदन पठाउने तयारी भएको उनले बताए ।

उनले भने, ‘यो नतिजाले विद्यार्थीको शिक्षा र फार्मेसी शिक्षाको स्तर यसले झल्काउँछ । चिकित्सा शिक्षा आयोग, सिटिइभीटी यो विषयमा गम्भीर हुनुपर्छ । यो सबले फार्मेसी शिक्षाको गुणस्तरमा समस्या छ भनेर संकेत गर्छ ।’