बिर्तामोड । राप्रपा नेपालका नवनिर्वाचित अध्यक्ष राजेन्द्र लिङ्देनले सरकार, न्यायालय तथा राजनीतिक दलसँग असन्तुष्टि व्यक्त गरेका छन् । आज गृहनगर झापाको बिर्तामोडमा आयोजित एक कार्यक्रममा बोल्दै नेता लिङ्लेनले त्यस्तो असन्तुष्टि व्यक्त गरेका हुन ।

‘सरकार सरकार जस्तो छैन, न्यायालय न्यायालय जस्तो छैन,’ अध्यक्ष लिङ्देनले भने,‘त्यो सञ्चालन गर्ने राजनीतिक दलपनि दल जस्तो छैन ।’ नेता लिङ्देनले राजालाई गाली गरेर राजनीति गर्ने दिन सकिएको बताए । कार्यक्रममा विभिन्न पार्टी परित्याग गरी राप्रपा प्रवेश गरेकाहरुलाई नेता लिङ्देनले स्वागत गरेका थिए ।

राप्रपा नेपालको भर्खरै काठमाण्डौमा सम्पन्न महाधिवेशनबाट अध्यक्षमा निर्वाचित भएपछि पहिलो पटक गृहनगर झापा आएका लिङ्देनलाई बुवा र चेलीबेटीले लिम्बु संस्कारअनुसार स्वागत गरेका थिए । अध्यक्ष निर्वाचित भएपछि पहिलो पटक भद्रपुर विमानस्थलबाट सयौँ शुभेच्छुक तथा कार्यकर्ताको स्कर्टिङ्मा कार्यक्रमस्थल आएका लिङ्देनले बुवालाई ढोगेका थिए । यस अघिका कार्यक्रमभन्दा यसपटक कार्यकर्ताहरुमा भिन्दै उत्साह देखिन्थ्यो ।

पार्टीका झापा अध्यक्ष केशवप्रसाद ओझाको अध्यक्षता र बिर्तामोड नगर अध्यक्ष रञ्जु प्याकुरेलले सञ्चालन गरेको कार्यक्रममा निमसरी राजवंशी, राम थापा, सगुनसुन्दर लावती, अमर विष्ट लगायतले स्वागत मन्तव्य राखेका थिए । अध्यक्ष लिङ्देन केहि दिन झापामा रहने बताइएको छ ।