बिर्तामोड । राष्ट्रिय प्रजातन्त्र पार्टी (राप्रपा)को आज बिहान सकिएको मतगणनाअनुसार लिङ्देन अध्यक्षमा निर्वाचित भएका छन । राजेन्द्रले एक हजार आठ सय ४४ मत ल्याएर अध्यक्षमा विजयी भएका हुन ।

अध्यक्षका अर्का उम्मेदवार कमल थापालाई २२७ मतान्तरले पराजित गरेका हुन । थापाले जम्मा एक हजार छ सय १७ मत ल्याएका थिए । चार सय १३ मत बदर भएको थियो । राप्रपाको कुल ४३७९ जना मतदातामध्ये ३८७३ मत खसेको थियो ।

लिङ्देनले सुरूदेखि नै मतगणनामा अग्रता लिएका थिए ।

निर्वाचनको मत परिणाम सार्वजनिक भएसँगै विजयी लिङ्देनलाई कमल थापाले बधाई दिएका छन । उनले एक ट्वीट गर्दै बधाई दिएका हुन । ‘प्रजातान्त्रिक मूल्य र मान्यता आत्मसात गर्दै राप्रपा अध्यक्ष पदको निर्वाचनमा भएको पराजय सहर्ष स्वीकार गर्दछु। नवनिर्वाचित अध्यक्ष राजेन्द्र लिङदेनलाई बधाई तथा शुभकामना। प्रतिकूल परिस्थितिमा समेत हामीमाथि विश्वास र भरोसा गर्ने पार्टीका सम्पूर्ण साथीहरुमा आभारी छु,’ थापाले लेखेका छन ।

थापाले पार्टीको आन्तरिक प्रतिस्पर्धामा निर्मल निवासको हस्तक्षेप भएको आरोप लगाएका छन्।

‘पार्टीको आन्तरिक प्रतिस्पर्धामा निर्मल निवासको नाङ्गो हस्तक्षेपको भत्सर्ना गर्दछु,’ उनले भनेका छन्, ‘मैले राहत र उन्मुक्ति पाएको छु ।’

लिङ्देन झापा निवासी हुन । उनी राप्रपा नेपालको तर्फबाट एकमात्र प्रतिनिधी सभा सदस्य हुन । उनले झापा क्षेत्र नम्बर ३ बाट नेकपा एमालेसँग गठबन्धन गरी प्रतिनिधी सभा सदस्यमा जितेका थिए । 

राप्रपामा नेतृत्व परिवर्तनको बहस चलेसँगै युवा नेता लिङ्देनको पक्षमा अधिकांश नेताहरुको समर्थन रहेको थियो ।