बिराटनगर । नेपाली काँग्रेसको १४औँ महाधिवेशनअन्तर्गत १ नम्बर प्रदेशको प्रदेश अधिवेशन आजबाट शुरु हुँदैछ । अधिवेशनको सम्पूर्ण तयारी पूरा भएको अधिवेशन आयोजक समितिले जनाएको छ ।

आज उद्घाटन हुने अधिवेशनको सम्पूर्ण तयारी पूरा भएको अधिवेशन आयोजक समिति संयोजक नेपाली काँग्रेसका केन्द्रीय सदस्य कृष्णप्रसाद सिटौलाले जानकारी दिए । प्रचार समितिका संयोजक राजीव कोइरालाले दिएको जानकारी अनुसार विराटनगर अस्पताल नजिकैको खुला मैदानमा आज २ बजे अधिवेशन उद्घाटन हुनेछ ।

अधिवेशनको तयारीको बिषयमा बुधबार बसेको बैठकले नेपाली काँग्रेस प्रदेश नम्बर १ को अधिवेशन आयोजक समितिको सम्पर्क कार्यालय मोरङ काँग्रेसको कार्यालयमा खोल्ने, प्रदेश अधिवेशन प्रतिनिधिको नामावली दर्ता बिहीबार पार्टी कार्यालयमा सुरु गर्ने, शुक्रवार बिहान ८ बजेदेखि १ बजेसम्म मोरङ पार्टी कार्यालयमा उम्मेदवारी दर्ता गर्ने र त्यही दिन अन्तिम नामावली प्रकाशन गर्ने निर्णय भएको कोइरालाले बताएका छन ।

प्रदेश पदाधिकारी चयन गर्न विराटनगर अस्पताल छेउको मैदानमा शनिवार बिहान ८ बजेदेखि चुनावी प्रक्रिया सुरु हुनेछ । चुनावमा एक हजार ७ सय प्रदेश प्रतिनिधिहरूले मत खसाल्ने छन् । जसमा शुभेच्छुक संस्थाबाट १७ र भातृ सङ्गठनका प्रतिनिधि १३ ले समेत मत खसाल्न पाउने छन ।

काँग्रेसको प्रदेश समितिमा एक अध्यक्ष, दुई उपाध्यक्ष, दुई महामन्त्री, तीन सह–महामन्त्री एक महिलासहित, हरेक जिल्लाबाट महिला १४ र खुला १४ सदस्य, प्रत्येक निर्वाचन क्षेत्रबाट ६ महिला र १३ खुला सदस्य, खस आर्यबाट महिला ७ र खुला ५, जनजातिमा महिला ७ र खुला ८, मधेसी महिला एक र खुला एक, दलित महिला एक र खुला दुई, थारुतर्फ महिला एक र खुला एक, मुस्लिममा खुला एक, अल्पसङ्ख्यक र अपाङ्गमा एक सदस्य पदका लागि निर्वाचन हुने बताइएको छ ।