बिर्तामोड । चितवनमा जारी नेकपा एमालेको १०औं राष्ट्रीय महाधिवेशनको बन्द शत्रमा झापाका ४ महिला सहित १३ जनाको नाम केन्द्रीय कमिटीका लागि प्रस्ताव गरिएको छ । प्रस्तावित ३०१ सदस्यीय केन्द्रीय कमिटीमा दुर्गा प्रसाईँ अटाउन सकेनन् ।

केन्द्रीय कमिटी सदस्यमा प्रस्तावित झापाका महिला नेतृहरु सुनिता बराल, गीता अधिकारी, मीना उप्रेती र मेनुका काफ्ले रहेका छन । त्यस्तै अन्य नेताहरु देवराज घिमिरे, अग्नी खरेल, रबिन कोइराला, हिक्मत कार्की, देबेन्द्र दाहाल, रोमनाथ ओली, जीतबहादुर दर्जी, गोविन्द थापा र हरी राजवंशी रहेका छन् ।

केहि समयदेखि केन्द्रीय सदस्य बन्ने चर्चा चलेका बिएण्डसी अस्पतालका प्रबन्ध निर्देशक दुर्गा प्रसाईँलाई भने ओलीले केन्द्रीय कमिटीमा समेट्न सकेनन् । बिर्तामोडमा आयोजित एक कार्यक्रममा तामझामका साथ नेकपा एमाले प्रवेश गरेका दुर्गा प्रसाईँ यतिबेला खिन्न छन । प्रसाईँ एमाले प्रवेश गर्नु अगावै एमालेको २०७८ असोज १५ देखि १७ गतेसम्म ललितपुरको गोदावरीस्थित सनराइज सम्मेलन केन्द्रमा भएको विधान अधिवेशनमा सहभागी भएका थिए ।

नेताद्वय केपी ओली र पुष्पकमल दाहाललाई काठमाण्डौमा मार्सी चामलको भात खुवाएको फोटो भाइरल बने राजनीतिक वृत्तमा चर्चामा आएका प्रसाईँ चितवनको महाधिवेशनमा पनि सेलिब्रेटी बनेका थिए । प्रसाईँले केन्द्रीय सदस्यका लागि उम्मेदवारी समेत घोषणा गरिसकेका थिए । तर, ओलीले वाचन गरेको ३०१ सदस्यीय केन्द्रीय कमिटीमा आफ्नो नाम नपरेपछि प्रसाईँ निरास बनेको बताइएको छ ।