बिर्तामोड । पूर्व पश्चिम राजमार्गअन्तर्गत आइतबार झापाको कनकाई नगरपालिका वडा नम्बर ८ स्थित बिरिङ पुलमा बस दुर्घटनाहुँदा २३ जना घाइते भएका छन । पूर्वबाट पश्चिम जाँदै गरेको ना ५ ख ८०४१ नम्बरको बस पत्ति भाँचिएर दुर्घटना भएको इलाका प्रहरी कार्यालय अनारमनीका प्रमुख सन्तोष आचार्यले जानकारी दिए ।

पत्ति भाँचिएर अनियन्त्रित भएको बस पुलको रेलिङमा ठोक्किएको थियो । बस हाल दुर्घटनास्थल मै रहेको र बसका चालक सुनसरी बराहक्षेत्र नगरपालिका ३ बस्ने बर्ष ३२ को बाबुराम कार्कीलाई प्रहरीले नियन्त्रणमा लिएको उनले बताए । दुर्घटनाबाट घाइतेहरु माइ नगरपालिका ७ इलामकी ३४ बर्षीया विमला लिम्बु, सोहि ठाउँकी ४९ बर्षीया रत्नमाया राई, सोहि स्थानकी ३७ बर्षीया कमला शेर्पा, सोहि स्थानकी ७ बर्षीया ईसु शेर्पा, कनकाई ८ बस्ने २८ बर्षीया दिपा गिरी, सुनसरी बराहक्षेत्र नगरपालिका ९ बस्ने ३७ बर्षीया निशा चौहान, पथरी शनिश्चरे मोरङ नगरपालिका १ की ६० बर्षीया मनमाया श्रेष्ठ, सोहि ठाउँ बस्ने ३५ बर्षीय डिकबहादुर श्रेष्ठ, सोहि ठाउँ बस्ने ४० बर्षीया अम्बिका श्रेष्ठ, बुद्धशान्ति ४ झापा बस्ने ६० बर्षीय नरबहादुर दर्जी र दर्जीकी श्रीमती ५८ बर्षीया डम्बरकुमारी दर्जीको बिएण्डसी अस्पतालमा उपचार भईरहेको डिएसपी आचार्यले जानकारी दिए । उनीहरुको अवस्था सामान्य रहेको बताइएको छ ।

कनकाई ७ बस्ने बर्ष १७ को उत्सव पौडेलको उपचारको क्रममा करिब १ बजेर ३० मिनेटमा मृत्यु भएको र उनको शव बिएण्डसी अस्पतालमा नै रहेको आचार्यले बताए । पौडेल देवी मावि बिर्तामोडका कक्षा ११ को विद्यार्थी भएको उनले बताए ।

त्यस्तै, अर्जुनधारा ११ की ३८ बर्षीया शुसिला चापागाई, बिर्तामोड ५ की ४१ बर्षीया पवित्रा खतिवडा, भारत सिलिगुडीका ४७ बर्षीय बब्लु बर्मन, सोहि ठाउँका ३३ बर्षीया मालती बर्मन, शिवसताक्षी १० का २४ बर्षीया जानुका श्रेष्ठ, माइ नगरपालिका ७ की १७ बर्षीया तनुजा लिम्बु, भारत आसाम बस्ने २८ बर्षीया इन्दिरा गिरी, सोहि ठाउँ बस्ने २१ बर्षीया बिन्दु गिरी, अर्जुनधारा ५ बस्ने ४८ बर्षीय कृष्ण अधिकारी, बसका सहचालक सुनसरी रामधुनी  नगरपालिका ६ बस्ने २५ बर्षीय करण चौधरी र बसका सहचालक सुनसरी बराहक्षेत्र नगरपालिका ३ बस्ने २४ बर्षीय रमेश कार्कीको बिर्तासिटी अस्पताल बिर्तामोडमा उपचार भइरहेको प्रहरीले जनाएको छ ।