बिर्तामोड । मेची अञ्चलका चारजना उत्कृष्ट करदाता सम्मानित भएका छन । कर सप्ताहको अवसरमा चार जिल्लाको एक एक जना उत्कृष्ट करदातालाई सम्मान गरिएको हो ।

आन्तरिक राजश्व कार्यालय भद्रपुरको आयोजना र विर्तामोड उद्योग वाणिज्य संघको संयोजनमा बुधबार विर्तामोडमा आयोजित एक कार्यक्रमका बिच उनीहरुलाई सम्मान गरिएकोछ । कर सप्ताहको शुभारम्भ गर्दै विर्तामोडको मुक्तिचोक परिसरमा आयोजित दशौं राष्ट्रिय कर दिवस तथा कर सप्ताहको अवसरमा झापाबाट भद्रपुरको साहेवाला ट्रेडिङ प्रा= लि=, इलामबाट फिक्कल उत्तम स्टोर, पाँचथरबाट जय अम्बे ट्रेडर्स एण्ड सप्लायर्स र ताप्लेजुङबाट सलिना सप्लायर्स सम्मानित भएका हुन ।

साहेवाला ट्रेडिङका तर्फबाट सञ्चालक अजय साहेवाला, फिक्कल उत्तम स्टोरका तर्फबाट सञ्चालक उत्तम श्रेष्ठ, जय अम्बेका तर्फबाट राजन काफ्ले र सलिना सप्लायर्सका तर्फबाट तीलमाया भट्टराईलाई कार्यक्रमका प्रमुख अतिथि नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले दोसल्ला तथा सम्मान पत्रद्वारा सम्मान गरेका थिए ।

आन्तरिक राजश्व कार्यालय भद्रपुरका प्रमुख शुभप्रसाद रिजालको अध्यक्षतामा आयोजित समारोहलाई सम्बोधन गर्दै प्रमुख अतिथि ढकालले नेपालको राजश्व आयातमा निर्भर रहेकोले आयातलाई प्रतिस्थापन गर्दै निर्यात र आन्तरिक करको दायरा बढाउनुपर्ने आवश्यकता औँल्याए । उनले राज्य र निजी क्षेत्रबीच सुमधुर सम्बन्ध भएमात्र देशले आर्थिक समृद्धि हासिल गर्नसक्ने बताउँदै राज्यले करको दर र क्षेत्र बढाउने भन्दापनि प्रविधिको अधिकतम उपयोग गर्दै करको दायरा फराकिलो बनाउनुपर्नेमा जोड दिए ।

झापाका प्रमुख जिल्ला अधिकारी श्रवणकुमार तिमिल्सिना, नेपाल उद्योग वाणिज्य महासंघ प्रदेश नं १ का अध्यक्ष टिकाराज ढकाल, केन्द्रीय सदस्य हेमराज ढकाल, १ नं प्रदेश सदस्य कुमार भट्टराईलगायतले शुभकामना मन्तव्य राखेका थिए ।