बिर्तामोड । मिलनसार बचत तथा ऋण सहकारी संस्थाले शेयरधनीहरुलाई १५ प्रतिशत नगद लाभांश वितरण गर्ने भएको छ । गत आर्थिक बर्षको मुनाफाबाट सो लाभांश वितरण गर्न लागेको हो ।

बिर्तामोड नगरपालिका वडा नं. ५ मा कार्यालय रहेको साकोसले गत आर्थिक बर्षमा ५० लाख ८ हजार ४४८ रुपैँया मुनाफा आर्जन गरेको साकोसका अध्यक्ष लक्ष्मीप्रसाद बास्कोटाले जानकारी दिए । यो अघिल्लो आवको भन्दा २२ लाख ७१ हजार १२० रुपैँयाले बढी हो । २०६६ सालमा ४ लाख १० हजार रुपैँया शेयर रकमबाट शुरु भएको साकोसमा हाल २ करोड ३३ लाख ५५ हजार ५ सय रुपैँया रहेको बास्कोटाले बताए । संस्थाले २ हजार ३४६ जना शेयर सदस्यहरुबाट ४ करोड ३९ लाख ९२ हजार ३८२ रुपैँया बचत संकलन गरेको सोमबार १२ औँ बार्षिक साधारण सभा आयोजना गरी जानकारी दिएको छ । संस्थाले १२ किसिमका बचत कार्यक्रम सञ्चालन गरेको छ भने न्यूनतम ७ प्रतिशतभन्दा माथि व्याजदर प्रदान गर्दै आएको छ । संस्थाले वित्तिय सुशासन कायम गरेका कारण बर्षेनी प्रगती गर्दै गएको सचिव दिनोज बजगाईले बताए ।