काठमाडौँ । हास्य कलाकार मनोज गजुरेलले मन्जु पोखरेलसँग विवाह गरेका छन् । मिना ढकालसँग ४ बर्षअघि डिभोर्स भएपछि सोमबार गजुरेलले ढकालसँग विवाह गरेका हुन् ।

असोज २५ गते सोमबार डोलेश्वर मन्दिरमा विवाह गरेको गजुरेलले आफ्नो फेसबुक पेजमार्फत जानकारी गराएका हुन् । डिभोर्स भएपछि आफूले बच्चाहरुको एक्लै हेरचाह गरिरहेको र जीवनयात्रामा आफूलाई पनि सहयात्रीको आवश्यकता महसुस गरी विवाह गर्ने निर्णय लिएको बतएका छन् । गजुरेलका अनुसार मन्जु कानुन सेवाकी अधिकृत हुन् ।

‘एकअर्काका जिम्मेवारीलाई साझा जिम्मेवारी मानेर पूरा गर्ने वाचा गर्यौँ । अगाडि आईपर्ने सुख र दुखलाई मिलेर स्वीकार र प्रतिकार गर्ने संकल्प लियौं । हामीलाई यो निर्णयमा पुग्न हाम्रा बाबुनानीहरुको सुझाव र सहमतीले पनि ठूलो मद्धत गर्यो,’ उनले लेखेका छन् ।

उनले निजी जीवनका बारेमा कपोकल्पित समाचार बनाउने, असम्बन्धित मान्छेसँग नाम जोड्ने, विगतको जीवन, वर्तमानको विवाह तथा भविस्यको योजनाका बारेमा अनुमानकारिता नगर्न पनि अनुरोध गरेका छन् ।

गजुरेलले सोमबार बिहान डोलेश्वर महादेवको दर्शन गरेर विवाह गरेपश्चात सपरिवार मानवसेवा आश्रम कौशलटारमा रहेका बुवाआमालाई खाना खुवाएको समेत बताएका छन् ।