झापा । भारतमा ४० वर्ष जेल बसेर नेपाल फर्किएका दुर्गाप्रसाद तिम्सिना आइतबार इलामबाट हराएकामा प्रहरीले फेला पारेको छ ।

६१ वर्षीय दुर्गाप्रसाद (दीपक जैसी) सोमबार बिहान फेला परेका हुन् । फिक्कल जाने बाटोमा पर्ने जौबारीमा उनी फेला परेको इलामका एसपी महेन्द्र श्रेष्ठले बताए ।

दुर्गाप्रसाद इलामको माई नगरपलिका-३ लुम्बाकका निवासी हुन् । लामो समय जेल बसेका कारण उनको मानसिक सन्तुलन पूर्ण रुपमा ठिक अवस्थामा छैन ।

आइतबार साँझ घरबाट हराएका उनी करिब ४ घन्टाको पैदल दूरीमा रहेको जौबारीमा फेला परेका हुन्। गएराति करिब १२ बजे उनलाई प्रहरीले मेची राजमार्गको जौबारीमा फेला पारेको दुर्गाप्रसादका भतिजा गोपाल तिम्सिनाले बताए।