बिर्तामोड । कनकाई नगरपालिकाले बजार अनुगमन गर्ने नाममा ब्यवसायीलाई आतंक सिर्जना गरेको पाइएको छ । सोमबार अनुगमनमा निस्किएको टोलीले उपभोग्य अवधि बाँकी रहेको बस्तुलाई म्याद नाघेको भन्दै नष्ट गरेपछि ब्यवसायी आतंकित बनेका हुन ।

अनुगमन टोलीले सोमबार कनकाई नगरपालिका–९ घैलाडुब्बा बजारमा रहेको यशोदा फार्मेसीमा अनुगमन गरेको थियो ।

अनुगमनका क्रममा सन २०२१ जुलाईमा उत्पादन भएको डाबर कम्पनीको च्यवनप्रास म्याद गुज्रिएको भन्दै नष्ट गरेको पाइएको छ । एनबी ०००२७ ब्याच नम्बर रहेको उक्त च्यवनप्रासको खरिद बिलमा म्याद समाप्ति मिति २०२४ जुलाई उल्लेख छ ।

फार्मेसीका संचालक जीवन सुवेदी सामान खरिद गर्न निस्किएको बेला टोलीले फार्मेसीमा अनुगमन गरेको संचालक सुबेदीले बताए । ‘श्रीमतीलाई फार्मेसी रुंग्न लगाएर सामान लिन निस्किएको थिएँ, आउँदा सामान जफत गरेर नष्ट गर्न लगिएको रहेछ’ उनले भने, ‘त्यो सामानको उपभोग्य अवधि बाँकी नै छ । मसँग प्रमाण छ भनेर नष्ट गर्न लागिएको ठाउँमा जाँदा मेरो कुरै सुनेनन, मुचुल्का गरेर ल्याइसकेको छ, मिल्दैन भोलि निवेदन लिएर आउनु भने ।’

आज नगरपालिकामा कुरा गर्न जाँदा अनुगमन संयोजक समेत रहेका उपप्रमुख आशा शर्मा शिवाकोटीले पत्रकार लिएर किन आएको भन्दै उल्टै हप्काएको सुबेदीले गुनासो गरे ।

नेपाल फर्मास्युटिकल्स एसोसिएसन कोशीका अध्यक्ष शम्भु साहले अनुगमन जरुरी रहेको तर टोलीमा बिषयविज्ञ सामेल हुनुपर्ने बताए । ‘खाध्यान्न पसल अनुगमन गर्दा डाक्टर गएर हुँदैन, त्यहाँ गुण तथा खाध्य सम्बन्धी ज्ञान भएकै मान्छे हुनुपर्छ’ उनले भने, ‘औषधि पसलमा त झन निरन्तर अनुगमन जरुरी छ तर अनुगमन टिममा त्यससम्बन्धि जानकार प्राविधिक कर्मचारी हुनुपर्दछ ।’

बजार अनुगमन समिति संयोजक नगर उपप्रमुख शिवाकोटीले भने बरामद गरेको सामानमा उत्पादन र उपभोग्य मिति दुवै उल्लेख नभएकाले नष्ट गरेको बताइन । अनुगमनमा नगरको स्वास्थ्य शाखाकी कर्मचारी टीका दवाडीसमेत उपस्थित भएको र नियमसंगत ढंगबाट अनुगमन गरिएको शिवाकोटीले जानकारी दिइन । ‘हामी जाँदा फार्मेसी संचालक हुनुहुन्थिएन, उहाँकी श्रीमतीसमेत स्वास्थ्य क्षेत्रकै हुनुहुँदो रहेछ, बरामद गरेको सामानमा उत्पादन र उपभोग्य मिति दुवै नभएको उहाँले समेत स्विकार गर्नु भएको हो,’ उपप्रमुख शिवाकोटीले भनिन, ‘११ बजे अनुगमन गरेका हौँ, ४ बजेतिर नष्ट गर्ने बेलामा उहाँको श्रीमान आउनु भयो र अनुगमन गर्ने नगरपालिकाको के अधिकार भन्दै प्रश्न गर्नु भयो ।’

नगर प्रमुख राजेन्द्रकुमार पोखरेलले बरामद सामानको उत्पादन र उपभोग्य मिति नभएको फोटो चाहिँ नखिचिएको बताए । पोखरेलले उक्त फार्मेसीले नगरपालिकामा व्यवसाय दर्ता नगरेको बताउँदै नगरबासीले नगरपालिकाको कार्यमा सहयोग गर्नुपर्ने बताए ।